U mubare w’abana b’abakobwa babyara batarashaka kuri iki gihe ugenda wiyongera, ku buryo hasigaye haboneka n’abakiga mu mashuri abanza babyara. Ikibabaje ni uko ababyeyi batabasha kwihanganira abana babo, bakabirukana mu rugo. Ese kubirukana si uburyo bwo kubashora mu buraya? Ubwabyo se si ukubahohotera?
Izi mpungenge zagaragajwe na Madamu Jeanne Nyirakamana, umwe mu bagize njyanama y’Akarere ka Huye. Yabwiraga abahagarariye inzego z’abagore mu Mirenge igize aka karere, abatuma ku bagore bahagarariye.
Madamu Nyirakamana yateruye agira ati “abagore turi guhohotera abana bacu. Umwana agize ibyago atwaye inda, ku ishuri baramwirukanye, nawe mu rugo uramwirukanye. Azaba hehe? Azatungwa n’iki? Umwana abyaye we azabaho gute? Aho abo si ba bandi batoragurwa ba nyina babataye?”
Akenshi abana b’abakobwa birukanywe n’ababyeyi gutyo basigaye biyunga ari nka batanu bakipangira inzu yo kubamo. Madamu Nyirakamana ati “aho bapanze baba batunzwe n’iki? Tureke gushora abana mu buraya”.
Ikibabaje ni uko muri abo birukanwa haba harimo na ba bandi bataye ishuri bakiga. Kwishora bakiri batoya mu buraya kubera ko nta bundi buryo bwo kubaho baba bashoboye ni ikibazo giteye inkeke mu muryango nyarwanda.
