A bagore b’abayisilamu mu karere ka Rubavu, taliki ya 30/12/2012 bagaragaje ibyo bagezeho bashobora no gufashanya kugira ngo bizihize iminsi mikuru neza.
Abagore b’abayislamu bo mu karere ka Rubavu bibumbiye mu ishyirahamwe bise urukundo bakora ibikorwa byo guteka, gufuma imyenda, gukodesha ibikoresho byo kuriraho no guteka, ndetse bagakodeshwa nabo ubwabo mu gukora akazi ko guteka no kwakira abantu kugira ngo bashobore gufashanya no kwikura mu bwigunge.
Ishyirahamwe DUKUNDANE riba mu mashyirahamwe 15 y’abagore b’Abayisilamukazi bo mu karere ka Rubavu bagira uruhare muri gahunda za Leta zitandukanye nko; kuremera abatishoboye, kwimakaza isuku aho batuye, gutegura no gusukura ibyumba by’itora mu gihe cy’amatora no kwimakaza urukundo hagati y’abantu n’abandi binyuze mu kugirana inama, gufashanya no mu mukino wa kakawete igikorwa bavuga ko gituma uwifashije afasha by’ukuri uwo arusha ubushobozi.
Nyiransekuye Zainabu ukuriye ishyirahamwe DUkundane avuga ko mu myaka 6 bamaze hari byinshi bagezeho, ryakuye abagore mu bwigunge, bahuriza hamwe ibitekerezo, barakora kuburyo iterambere rimaze kugera ku banyamuryango bose bitewe n’icyo binjiza aho yemeza ko mumwaka bashobora kwinjiza miliyoni agashyirwa kuri Konti.
Iki gikorwa gituma ijwi ry’abagore rirushaho kuzamuka kikaba gishimwa n’umuyobozi w’akarere wungirije ushinzwe imibereho myiza Nyirasafari Rusine Rachel uvuga ko Gukomeza kwimakaza urukundo, ubumwe n’isuku no kubahiriza gahunda ya guverinoma y’Ubumwe bw’Abanyarwanda, abagore bose bakwiye kubishyira mu bikorwa mu kwiha agaciro no kugaha igihugu cyabo bahereye mu miryango batuyemo.
